Ozodbobo.uz

QvZ "Xoja Nasriddin" ligasi

Previous Next

Ассалому алайкум, азизлар, қадрдонлар!

Бухоро... Бу номни эшитганда юракларда аллақандай сокинлик, аллақандай улуғворлик уйғонади. Асрларнинг синовидан ўтган, ҳар бир гиштида тарих нафаси уфуриб турган Бухорои Шариф... Бу заминда дунёга келган алломалар, буюк аждодларимиз ҳақида соатлаб гапириш мумкин. Аммо Бухоро фақат тарих, фақат ўтмиш эмас. Бухоро – бугун ҳам навқирон, бугун ҳам ҳаёт қайнаб турган, янгиликларга интилаётган гўзал шаҳар!

Энди тасаввур қилинг, мана шу қадимий ва ҳамиша ёш шаҳар бағрида янги бир чақнаш, янги бир ҳаракат бошланаяпти. Бу – ёшликнинг, зукколикнинг, доно кулгининг ҳаракати! Ҳа, Бухоро заминида илк бор "Қувноқлар ва Зукколар"нинг ўзига хос, фақат шу заминга хос янги лигаси – "Хўжа Насриддин" лигаси ташкил этилмоқда!

Нега айнан Хўжа Насриддин? Чунки бу ном – Бухоронинг тимсоли, унинг руҳи! Хўжа Насриддин – донишмандлик ва ҳозиржавоблик рамзи. Унинг ҳар бир латифасида кулги ортида яширинган чуқур маъно бор, ҳар бир ҳазилида ҳаёт фалсафаси мужассам. У кулдириб ўйлантирган, ўйлантириб кулдирган донишманд. Қадим Бухоронинг руҳи, унинг халқчил донолиги энди ёшларнинг саҳнадаги чиқишларида, уларнинг ҳазил-мутойибаларида акс этади.

"Қувноқлар ва Зукколар" – бу шунчаки бир кўнгилочар томоша эмас, азизлар. Бу – ёшларнинг катта ҳаётга тайёрловчи мактаби. Бу – саҳнада фикрни чиройли ифодалаш, ҳозиржавоблик, топқирлик синови. Бу – миллатнинг эртанги куни бўлган ёшларнинг интеллектуал салоҳиятини намоён этувчи майдон! Энди бу майдон Бухоро ёшлари учун алоҳида, уларнинг ўзига хос юмор туйғуси, Бухороча лутфлари билан бойийди.

Қадим Минораи Калон соясида, Лаби Ҳовузнинг сокин мавжларига ҳамоҳанг янграйдиган кулги... Бунда ўзгача файз, ўзгача тароват бор, шундай эмасми? Бухоро саҳнасида янги Насриддинлар, янги ҳозиржавоб, зукко йигит-қизлар кашф этилади. Улар бизни кулдиради, завқлантиради ва энг муҳими – ўйлантиради. Зеро, ҳақиқий кулги – бу инсонни фикрлашга ундайдиган кулгидир!

Шундай экан, азизлар, Бухорога хуш келибсиз! Янги "Хўжа Насриддин" лигасининг туғилишига, Бухоро ёшларининг янги парвозига гувоҳ бўлинг! Уларнинг шўх қаҳқаҳалари қадим Бухоро осмонида акс-садо берсин! Зеро, донишманд кулги – миллатнинг кўрки, ёшлик шижоати эса – унинг келажагидир!